فى العربيات يا عروسة ..

فى العربيات ..

فى طفل صغير بيصرخ من الجوع فى الكار سيت .. و مامته مستنية توصل بيتها بفارغ الصبر عشان تأكله ..

فى شخص محتاج يدخل الحمام بسرعة جدا ..

فى مريض سكر أو ضغط محتاج الدوا فى أسرع وقت ..

فى واحد متأخر على إجتماع شغل ..

فى حد محتاج يوصل المستشفى حالا ..

فى أب و أم عايزين يرجعوا لأطفالهم فى لحظة ..


و فى عروسة و عريس .. عاملين زفة ..


 فى شارع هما معتبرينه هادى .. و سادين الطريق .. و بيخمسوا .. و بزمروا و يزعجوا أصحاب الحظ البائس الساكنين على الطريق  .. و بيزلوا كل اللى ماشى وراهم .. و بيعطلوه .. و يأخروه .. عشان هما عايزين يفرحوا و يهيصوا .. و فليذهب الجميع إلى الجحيم .. عشان العروسة تتبسط ..

بس العروسة مش هتتبسط .. لان أى شخص من دول ممكن يدعى عليها .. ربنا ينتقم منها .. و يدعى لربنا إنه مش مسامحها .. عشان عطلته و زلته ..

بالنسبالى كشخص خياله واسع حبتين .. بترجم أى حدث سخيف او حزين فى أى فرح للدعوة دى ..
العروسة تتاخر و الصور بتاعة الفرح تضيع  .. يحصل خناقة فى الفرح أو أى شئ يعكر صفو العروسين .. عشان اللى عملته  فى الناس عشان الزفة ..

أتذكر مرة إنى عيطت بسبب زفة عروسة .. كنت مستعجله جدا و زمرت كتير عشان يفتحولى حارة واحدة أعدى .. و الزمارة أزعجت موكب العروس و عكرت ألحان الكلاكسات .. فققرروا إنهم يحشرونى وراهم .. و يسدوا الـ3 حارات .. و يمشوا سلانسيه .. أو بمعنى أوضح على أقل سرعة ممكنة .. و قعدوا يهزروا مع بعض من الشباك و يتكلموا كأنهم بيكلموا بعض من البلكونة مش من شباك العربية ..

 و للاسف الطريق كان سريع و مفيش أى شوارع جانبية ممكن ادخل منها
*لأهل الإسماعيلية : هو الطريق من قدام الفرسان لمسجد الزهراء .. اللى فيه معسكر الجيش *

إتقوا الله و إعتبروها إماطة أذى عن الطريق ..

دا الرسول نهى عن الوقوف فى الطرقات بدون سبب لمنع الأذى عن الناس .. أمال سد الطريق خالص  !!

عَنْ أَبِي سَعِيدٍ الْخُدْرِيِّ قَالَ: قَالَ رَسُولُ اللَّهِ صَلَّى اللَّه عَلَيْهِ وَسَلَّمَ:

((إِيَّاكُمْ وَالْجُلُوسَ فِي الطُّرُقَاتِ، قَالُوا: يَا رَسُولَ اللَّهِ, مَا لَنَا مِنْ مَجَالِسِنَا بُدٌّ نَتَحَدَّثُ فِيهَا، قَالَ: فَأَمَّا إِذَا أَبَيْتُمْ إِلا الْمَجْلِسَ, فَأَعْطُوا الطَّرِيقَ حَقَّهُ، قَالُوا: يَا رَسُولَ اللَّهِ, فَمَا حَقُّ الطَّرِيقِ؟ قَالَ: غَضُّ الْبَصَرِ، وَكَفُّ الأَذَى، وَرَدُّ السَّلامِ، وَالأَمْرُ بِالْمَعْرُوفِ، وَالنَّهْيُ عَنِ الْمُنْكَرِ))

بس يا علا الزفة حلوة و بتحسسنا بالفرح ... !!!!!!!!!!!!!!!!!!!1