الخروجة والتوك توك ..

إمبارح وأول إمبارح خرجت مع صحابى .. حال البلد و تأثيره علينا بإختلاف حالتنا الإجتماعية ما بين مخطوبين و متزوجين .. ما بين موظفات و ربات منزل .. كان كبير ..سخيف ..مزعج .. خانق .. آخد من أرواحنا .. من طاقتنا .. من إبتساماتنا و أحلامنا عن مستقبل مرسوم فى خيالنا  و تفكيرنا و تخطيطنا ..

الأمل الوحيد كان اننا احسن من غيرنا .. اننا لسه قادرين على متطلبات الحياه الاساسية .. الساقية بتاعتنا لسه بتدور .. لسه مترماش فيها حجر يقف ترس الساقية و يشلها و يشل حياتنا معاها

لسه قادرين نبتسم و نخرج و نحاول نطمن بعض باننا احسن من غيرنا كتير .. و كأن الفقر و الكرب هيبدأ من تحت لفوق .. فلسه دورنا مش هيجى دلوقتى .. نلحق نتمتع بقى .. ناخد نفسنا ..

كأنك شايف دخان  حريق كبير من بعيد .. بتحاول تقنع نفسك إن الدخان بعيد مش هيصيبك غير شوية خنقة من ريحته .. لكن بعيد عليك اوى تروح لحد هناك و تطفى .. بعيد عليك اوى فمش هيصيبك فتديله ضهرك و تسد مناخيرك شوية أو تاخد نفس من شباك تانى ..

لحد إمتى ؟؟!!! مش عارفة .. التفكير و الخوف بيخنق اكتر واكتر .. فتبطل تفكر لو تقدر عشان تاخد نفسك ..


سواق التوكتوك ..ليه كدا ؟؟ ليه صحيت كل الخوف والقلق والثورة اللى بنقتلها جوانا ..

هتبقى انت خالد سعيد تانى ؟؟ او كلامك هيدفعنا تانى ؟؟!!

وليه هو ؟ ليه مش أنا مثلاً ؟؟ مش كان ايفينت على فيس بوك ؟؟ سهل يتعمل الايفينت .. سهل ننزل تانى .. هتنزلى يا علا ؟؟

طيب أول ضربة او سحلة او رصاصة او ليلة فى الحبس مع الجنائيات مثلاً ؟

ورامى و ماما و بابا واخواتى واهلى ..

عشان القضية يهونوا عليكى ؟ ولا البلد تهون عشانهم ؟
طيب لو كله راح على الفاضى زى المرة اللى فاتت ؟؟؟!!

ولا دا مش دورك ؟! خليكى ست بيت كويسة و خلى بالك من جوزك و راعيه ..

طيب نهرب من البلد و نديها ضهرنا تماماً ؟ .. طيب والاهل والعيلة والصحاب والافراح والاعياد و المياتم .. والهوية واللغة و العيال اللى لسه مجوش .

طيب و بعدين ؟!

ولا نفضل هنا ؟! نعيش يوم بيومه زى الارزقيه ؟؟ ولا احلام و لا خطط لانها كل يوم عن اللى قبله بتدمر ؟؟ .. و نشوف الدنيا حولينا كل يوم و نصبر نفسنا اننا هنعيش فى الآخرة .. طيب سكوتنا عن كل الظلم دا  هودينا فين يوم العرض والحساب ؟؟


ليه كدا يا سواق التوكتوك  ..