عن رمضان و كدا يعنى ..

آفة المصريين فخرهم بأنفسهم و إعجابهم بعقولهم .. و الله لو أنهم أنكروا ذاتهم قليلا لأصبحوا خير أمة !! 

لكن الغرور و التكبر و إن كل واحد شايف نفسه صح و الوحيد اللى صح  أصبح سمة مجتمعنا 

أصل فى مثل مصرى بيقول  "لما إتفرقت الأرزاق محدش عجبه رزقه  .. و لما إتفرقت العقول كل واحد عجبه عقله !! " 

و أنا إيه اللى جابنى هنا ؟!! :\ أنا جاية أتكلم عن رمضان !! 


----------------------------------------------------

رجاءاً كفاية شكوى من الحر و العطش .. الموضوع دا بقى خنيق أكتر من سؤال " صايم ولا زى كل سنة ؟! " !! !! 

----------------------------------------------------

رمضان مش بتاع مسلسلات .. خصوصا لما تكون المسلسلات نسبة البذاءة فيها عالية كدا !! ..  

رمضان مش بتاع مسلسلات  .. يرحمنا و يرحمكم الله ! :)

و على رأى سلمى .. كل دى مسلسلات و فلوس بالمليارات و مصر طالعة تشحت فى الأخر !! حاجة تكسف  !! :\ 

----------------------------------------------------

نفسى أفهم إيه وجهه نظر أم تاخد  أطفال المسجد للتراويح ؟!!

ابوس إيديكوا إرحمونا !! .. الرضع دائمى الصراخ 
الأطفال دائمى الحركة و الكلام  و يبقى يا سوء حظك بقى لو إنتى واقفة جمب الأم !!

يفضل الطفل يشدك عشان إنتى وحشه واقفة جمب ماماتى ليه !!  و يعدى من الصف و يبوظ إنتظام الصف و حاجة غلب !! :\ 

و كله كوم بقى و بنات 12 -15 سنة اللى بيجوا الجامع بالغصب .. فتصلى العشا بالعافية و هى قاعدة أثناء القراءة .. و بعدين تفوت أول ركعة تراويح و تقعد على جنب تلعب فى الموبايل !! 

أو تأزأز لب !! أو تحكى عن مغامرتها لما كانت  بتعمل أى حاجة !!  و تبقى متحمسة كدا و هى بتحكى و اللى بتصلى جمبها دى تتفلق مش مهم !! 

اللى نفسى أفهمه أكتر ليه ولد عنده 10 سنين ميصليش مع الرجالة ؟!؟! ليه ها ؟ ليه ليه ها ها ؟!!!  

من أكتر الحاجاة اللى بتسوءنى إن ولد يترعرع فى مجتمع النساء و دا مش مكانه !!

أتمنى من كل قلبى الظاهرة دى تختفى ! :( 

----------------------------------------------------

آداب المسجد تنتهك .. و أخطاء المصليات تدل على إنعدام الوعى الدينى بطريقة توجع القلب كدا !! 

أتمنى من كل قلبى إن خطباء المساجد يتكلموا عن أبسط الأمور

زى تسوية الصفوف 

الصف يبدأ من اليمين 

الأطفال فى الخلف 

المصليات على الكراسى جنب بعض 

ولازم الصفوف الأولى تكون كاملة الأول .. يعنى لازم دايما تتأكدى إن الصف اللى قدامك كامل و إلا إطلعى كمليه .. و لو كل الناس عملت كدا لا هيبقى فى فراغات فى صف أمامى ولا هنعد نشد بعض يمين و شمال لحد ما الفاتحة تخلص !! :\ 

و يا لام بقى لو واحدة حاطة مصليتها فمش عايزة تتحرك تضبط الصف عشان متسيبش المصلية !! 

أو واقفة قدام المروحة و مش عايزة تبعد عنها !! 

ياريتنا نحتسب حر المساجد لعل الله يجيرنا حر جهنم و نبطل نعمل كدا !
او إلزمن منازلكن يرحممنا و يرحمكم الله ! 

----------------------------------------------------

و الجدير بالذكر بقى ! 

البرفان و المونوكير فى التراويح 

دلوقتى دا لا يجوز .. يغضب الله ! ..

متعرفيش ؟! .. ليتنا نهتم بتعلم أبسط الأشياء عن ديننا ! :(

طيب عارفة و مصرة !! 

طيب إنتى جاية تصلى لمين ؟! و إيه الكبر فى إنك تعصى فى الطاعة و هو كدا و مفيش غير كدا !!

لا حول ولا قوة إلا بالله ..

----------------------------------------------------

متنسوش النية و إنتوا فى المطبخ .. طاعة الزوج 

طاعة الوالدين 

خدمة الأهل 

إفطار صائم 

----------------------------------------------------

الدعاء ثم الدعاء ثم الدعاء يرحمنا و يرحمكم الله 

----------------------------------------------------

أخيراُ و ايس آخراً .. أرجو أن تعذروا إرتباك قلمى .. فأنا لم أكتب منذ مدة طويلة ..