مقالة ملهاش إسم ولا رسم !

أفتح الفيس بوك ...
أحاول أتجنب البوسطات السياسية فمقدرش

ألاقى مروة بتحاول تفهم الناس . بس من كتر حرقة الدم و عدم القدرة على إستيعاب عدم إستيعاب الطرف الأخر .. كلامها يطلع حاد ..و بتحط صور صعبة أوى .. هى و ناس تانين .. الصور دى مؤذية أوى ..  مروة مش إخوان .. بس بتدافع عن الإسلامين


البوسط اللى بعده .. أية  بتتكلم بعقل و خلفية سياسية كبيرة .. بتتكلم بثقة .. لو البوسط جد يبقى جد من غير هزار .. أيه اول واحدة شفتها وافقت على تفويش السيسى ..

أية أخوها ضابط فى الجيش المصرى .. هى شايفة التفويض حماية ليه و لزمايله

فيروز مقضياها حسبنة  .. فيروز رقيقة و هادية و مغلوبة على أمرها .. أحسبها تكره الجدال بتكتفى بإعلان إستيائها و كفى ..

فيروز مش إخوان بس بتدافع عنهم

أمانى مقضياها تريقة بقى .. على وزن " يا سيسى أمرك أمرك يا سيسى .. و تحب تاخد الباسورد " بس إرهاق نفسى بالنسبالى أشوف بوسط عزاء  و بعديه تهريج فى نفس الموضوع

عزاء إيه ؟!

عزاء أحمد السيد  - الفرقة السادسة طب - الإسماعيلية

اللهم إنى لا أزكى عليك أحد و لكننى أحسبه خلوقاً حافظاً للقرآن

شفته عند دكتورة مها .. أستاذته فى الكلية ..كانت كاتبة البوسك بصيغة "  إبنى أحمد استشهد "  أعلنت أنها لن تقبل فيه العزاء من الموفوضين ..

إيناس كمان كانت كاتبة عنه .. كان زميلهم ..

أمانى مبتكتبش تريقة بس والله ! ..
 كانت كاتبة سيناريو ليه الإخوان مات منهم ناس النهاردة

مقدرتش أكمل البوسط ..

بس أول كومنت كانت آثار بتقولها حسبى الله و نعم الوكيل

و شوية شد و جذب  خلونى مش قادرة أكمل قراية ..  جيت أكتب كومنت .. لقيت نفسى مسدودة و حاسة إنى كرهت كل حاجة و طايقة اتكلم حتى ..

كنت ناوية أقول إن فى عزاء وجب إحترامه .. بس سكت !

آلاء بتقعد تقوول دى فتنة و بلاش الكلام دا و إحنا صحاب مينفعش نخسر بعض ..
مقدرتش أكمل الردود

كوثر طيبة .. مبتحبش الإخوان بس مش قادرة متتعاطفش معاهم .. بتحاول تقنع الناس إن كدا حرام .. بس محدش سامعها ولا شايف كلامها .. زى المهندسة سمر كدا .. و زى سلمى .. صعبان عليهم الإخوان عشان هما " بشر "

سلمى بالذات صعبان عليها مرسى .. دايما تكرر إنه كان كبش فدا

دعاء بيتكرة الإخوان .. بس مش بتتناقش .. بتعرض أفكار .. كدا كدا مش بتفتح الفيس كتير أصلاً ..

نهال و رضوى بطلوا كلام فى السياسة تقريباً .. كانوا زمان بيقعدوا يتخانقوا مع رنا و أسماء بس دلوقتى كلهم سكتوا ..

انا نفسى إتسدت ..

و ياسمين كمان .. كانت عمالة تقول بلاش ندعى على بعض .. حرام كدا كفاية أوى كدا !

و إكتشفت إنى لو نزلت المظاهرة النهاردة و مت فيها .. صحابى هيقولو إيه اللى نزلها و هيقولو إن إتعمللى غسيل مخ و ناس تانية هيستغلوا موتى فى الدفاع عن قضيتهم و موقفهم .. و هيقعدوا يتخانوا و يفوتوا صلاة الجنازة

تفتكروا ممكن يضايقوا منى أوى لدرجة إنهم ميجوش أصلا ؟َ!


انا جالى إنهيار عصبى ..

بس بقى
كفاية بقى !